| لاوالله الا .. لاتجي والعلم خذ علمٍ وكاد |
حبك تلاشى وانتهى .. والافضل انك ماتعود
|
| لالاتحاول مابقى .. فالقلب لك ذرة وداد |
ياللي رحلت وكن مالي بالوجود اية وجود
|
| ماينفع التسديد لافاتت مواعيد السداد |
قطّع فواتير الوفا .. واحرق ملفات الوعود
|
| ماهي علوم السندباد وشهريار وشهرزاد |
ما للجحود اليوم عندي ياجحود الا الجحود
|
| امشي على وضح النقا المجرود واحب الحياد |
ولا اداني انصاف الحلول ابدن ولا اخون العهود
|
| صابر على ضيم الدهر واجاهد ايامي جهاد |
والعمر ينقص والليال السود ماتنقص تزود
|
| من معركتْك ابنسحب واسحب جنودي والعتاد |
ولانسحاب احياناً ارحم من معاناة الصمود
|
| ولايندمل جرح البياض اليا دنا منه السواد |
ولاتطيب العله اللي بين بيض وبين سود
|
| كنت اتبعك حافي قدم وامشي على جمر وكداد |
سلك الحرير يقودني ويسوقني ذعذاع نود
|
| وتعبت انادي ياحياة الروح يا كل المراد |
ومليت اقول اليوم والا باكر بوصلك تجود
|
| انشد مجاهيم الليالي في ربيع وفي جماد |
ياما علشانك سهرت الليل والعالم رقود
|
| اسهر على ذكراك وعيوني مطاولها السهاد |
وسهيل والويل وسواد الليل ياظالم شهود
|
| صدك ذبحني والجفا قطّع معاليق الفؤاد |
ياللي بتعذيبي تماديت وتجاوزت الحدود
|
| حتي عصافير الوله فالصدر من جور البعاد |
ماتت على هدف الضلوع اتردد الحان الخلود
|
| وحتى الرسايل لاجتك من كبريائك والعناد |
صارت جنايز والظروف اكفان ودروجك لحود
|
| عذّبت قلبي واضطهدت الشوق بالهجر اضطهاد |
لين الغلا مات ودفنته في جراهيد الصدود
|
| لالا تبرر موقفك واعلن على الحب الحداد |
وترى البكا ماينفع الميّت ولا لطم الخدود
|
| الحب شوق وجاذبيه وانقياد بلا قياد |
وصدق و وفا واخذ وعطا ماله حدود ولا قيود
|
| وكلن على ما قيل يلقى مازرع يوم الحصاد |
واكيد من من تزرع يمينه شوك ما يقطف ورود
|
| واليوم لامنك بغيت العلم خذ علمٍ وكاد |
حبك تلاشى وانتهى وان طعت شوري ماتعود |
