| ياقلب انا المخطي بها الوضع والا انت |
والا سحرك الصوت وانا سحرني
|
| صرت انتظرها كيف وانا الذي كنت |
كل العذارا قبلها تنتظرني
|
| عهدي بنفسي حر طــير تشـيهنت |
واشوف انا فرخ الحمامه اسرني
|
| بنت بضحكتها تولعت وفتنت |
حبيتها الا شويه....الله سترني
|
| لافي وصايفها بعيني تمعنت |
حتى اطمن خافقي ويعذرني
|
| حتى اسمها من اسمها ماتيقنت |
تقول حرف وباربعه تختبرني
|
| يابنت انا ماني بناقص هوى بنت |
اليوم يجبرني وباكر كسرني
|
| ولاني على باب المحبه تمسكنت |
احد يعبر بي واحد مااعتبرني
|
| لا والله الا رافع الراس ماهنت |
ما اطيع وقت بالمهانه جربني
|
| وان اشهد اني لاتولعت ماخنت |
ولا هجرت الا حبيب هجرني
|
| واني الا عاهدت لي وافي صنت |
واليا عطيت اعطي وغيرك خبرني
|
| وليا عشقت اغليت واوفيت واحسنت |
واذا خسرت احد اعتبرته خسرني
|
| هذا انا يابنت ان زنت او شنت |
لا منكر اصلي ولا اصلي نكرني
|
| ربعي بدو مهما بطبعي تمدنت |
وابوي لشداد الليالي ذخرني
|
| اما شعرت اني بقلبك تمكنت |
والا طريق جابني ينتظرني |
